Eliminimi nga Champions League vazhdon të djegë për Barcelonën, që u rrëzua në mënyrë dramatike në gjysmëfinalen e kthimit kundër Interit në “San Siro”. Pas fitores 4-3 të zikaltërve, mbas kohës shtesë, blaugranat akuzuan gjyqtarin polak Szymon Marciniak për disa vendime që, sipas tyre, i kanë dëmtuar.

"Është e vërtetë, arbitri bëri gabime. Te goli i tretë i Interit ka faull ndaj Gerard Martin, ndoshta edhe prekje me dorë. Por nuk duhet të kërkojmë justifikime", – tha Ronald Araujo në zonën mikse, duke ruajtur një ton të matur. Më i ashpër ishte Gavi, i cili në Instagram shkroi: “Është shumë e rëndë, sidomos kur e dimë sa pranë ishim, culers. Nuk donin që të shkonim në finale, kishin frikë nga sezoni ynë”.

Kritikat u përqendruan në dy episode kyçe: penalltia e dhënë për Interin pas një ndërhyrjeje me rrëshqitje të Cubarsit ndaj Lautaro Martinez në pjesën e parë, si dhe faulli i supozuar i Dumfries ndaj Gerard Martin në aksionin që çoi në golin 3-3 të Acerbi.

Shtypi katalanas reagoi me ashpërsi. “Mundo Deportivo” përmendi simpati të mëhershme të Marciniak për Real Madridin, ndërsa “Sport” shkroi: “Marciniak vendosi ta shuajë ëndrrën heroike të Barçës”.

UEFA e ka mbrojtur arbitrin e saj. E kontaktuar nga “Marca”, organizata kryesore europiane e futbollit tha se “nuk ka asnjë problem” me gjykimin e ndeshjes nga Marciniak, të cilin e konsideron një nga gjyqtarët më të besueshëm në nivel ndërkombëtar. Ai ka arbitruar, ndër të tjera, finalen e Kupës së Botës 2022 mes Argjentinës dhe Francës, si dhe vazhdon të jetë në garë për të gjykuar finalen e Champions-it më 31 maj në Mynih.

Përjashtimi i Clément Turpin dhe François Letexier për shkak se PSG është në finale mund t’i hapë derën pikërisht Marciniak, edhe pse ai nuk është i vetmi kandidat.