Fier, 7 Maj 2025 – Një aksident rrugor është regjistruar sot rreth orës 14:50 në aksin "Fier–Lushnjë", në vendin e quajtur “Vajkan”, ku një kamion është përplasur me një ambulancë.

Sipas informacionit paraprak nga Policia e Fierit, në aksident janë përfshirë një automjet tip “Kamion”, me drejtues shtetasin I. S., dhe një ambulancë që drejtohej nga shtetasi J. T. Si pasojë e përplasjes, janë lënduar katër persona: pacienti 38-vjeçar G. Z., që po transportohej nga Spitali Psikiatrik i Vlorës drejt banesës së tij, si dhe tre persona që e shoqëronin atë.

Të lënduarit janë identifikuar si E. Z., 74 vjeç, babai i pacientit dhe banues në Skrapar; H. B., 54 vjeç, punonjës policie në Komisariatin e Skraparit (SPZ); dhe T. M., infermier nga Çorovoda. Të katërt ndodhen në spital nën kujdesin e mjekëve dhe raportohen jashtë rrezikut për jetën.

Grupi hetimor ndodhet në vendngjarje dhe po punon për zbardhjen e rrethanave të aksidentit.