Në një nga episodet më të fundit të podcast-it të tij, Toni Kroos, legjenda gjermane dhe ish-mesfushori i Real Madridit, ka bërë një vlerësim të fortë dhe pa rezerva për Pedrin, yllin e Barcelonës. Edhe pse rival historik në fushë, Kroos nuk i kurseu fjalët për ta cilësuar 21-vjeçarin si një prej lojtarëve më të rëndësishëm në futbollin modern.

Pa hezitim, Kroos tha: "Pedri është më i miri në botë në rolin e tij. Për mua, një lojtar si ai është më i rëndësishëm se Lamine Yamal, Raphinha apo Lewandowski".

Një pohim i tillë, që e vendos mesfushorin kanarian përpara sulmuesve më të mëdhenj të skuadrës katalanase, tregon qartë sa shumë e vlerëson Kroos ndikimin që ka Pedri në fushë. Sipas tij, fatet e ndeshjeve nuk varen vetëm nga ata që shënojnë, por edhe, ndoshta më shumë, nga ata që dinë të ndërtojnë dhe kontrollojnë lojën: "Sulmuesit i vendosin ndeshjet me golat e tyre, por për të arritur deri aty duhet dikush tjetër që të asiston. Pedri është aktualisht lojtari më i mirë në botë në rolin e tij".

Kroos theksoi më tej se mungesa e Pedrit ndihet menjëherë në çdo ndeshje, pavarësisht kundërshtarit. Ai nuk është vetëm një lojtar që kontribuon me statistika, por element kyç në çdo aspekt të lojës: "Pedri, në përgjithësi, është një lojtar që të mungon kur nuk luan, pa marrë parasysh kundërshtarin. Nuk kufizohet te golat apo asistet, ai ofron zgjidhje".

I impresionuar nga performancat e tij këtë sezon, Kroos vuri në dukje se Pedri ka spikatur jo vetëm në ndeshjet e Champions League, por edhe në La Liga, ku shifrat individuale flasin vetë: "E kam vëzhguar çfarë po bën këtë sezon, jo vetëm në Champions. Ai po dominon kundërshtarët në çdo ndeshje. Në La Liga është edhe më spektakolar. I ka kaluar mesatarisht 11-12 herë mbrojtësit për ndeshje, çka është një nga gjërat më të vështira për një mesfushor. Për mua është më i miri. Nëse humb një lojtar si ai, e ndien menjëherë".

Në përfundim, Kroos e cilësoi Pedrin si një mesfushor unik, me dhunti të rralla për të dribluar në hapësira të ngushta. Cilësi që, sipas tij, e bën të pazëvendësueshëm: "Pedri është një nga të paktët mesfushorë në rolin e tij që ka dhuntinë për të dribluar në hapësira të ngushta. Një lojtar si Pedri të ndihmon në çdo fazë të lojës”.