Kristjan Asllani ishte protagonisti absolut në fitoren minimale të Interit kundër Hellas Verona, duke shënuar golin e vetëm të takimit me penalltinë e ekzekutuar me qetësi të jashtëzakonshme. Në mungesë të Hakan Calhanoglu, mesfushori shqiptar mori përsipër jo vetëm “regjinë” e lojës, por edhe përgjegjësinë për të goditur nga pika e bardhë. Dhe nuk zhgënjeu. Performanca e tij e kompletuar u reflektua edhe në vlerësimet e larta që mori nga mediat më të rëndësishme italiane.

“TuttoMercatoWeb” e vlerëson me notën 7, duke theksuar: “Nga Calhanoglu trashëgon edhe detyrën e ekzekutuesit të penalltive. Asllani u shfaq i ftohtë nga pika e bardhë. Gati sa nuk realizoi një dopietë nga distanca, e dha rotacionit të Interit një ritëm të moderuar, mjaftueshëm për ta çuar ndeshjen drejt një fitoreje, që nuk u vu asnjëherë në diskutim”.

Edhe “Corriere dello Sport” i jep notën 7 shqiptarit: “Për shkak të pezullimit të Calhanoglu, e nis titullar si ‘regjia’ e skuadrës dhe imitoi turkun nga pika e bardhë. Kësisoji, Asllani i dha fund ‘thatësirës’ së golit në Serie A që zgjaste prej më shumë se një viti. Ai kishte nevojë për një mbrëmje të tillë për të forcuar vetëbesimin”.

Vlerësim identik vjen edhe nga “L’Interista”, portali pranë ambientit zikaltër: “Jo Zielinski, por goditi ai nga pika e bardhë. Asllani veshi mantelin e superheroit si ‘Super-Calhanoglu’ dhe zhbllokoi një ndeshje potencialisht të rrezikshme me një goditje të papritshme. Arkitekti i mesfushës zikaltër, edhe në 3/4 e fushës. Goli i tij i dytë sezonal, pas atij ndaj Lazios”.

“Gazzetta dello Sport” tregohet disi më e rezervuar, duke i dhënë notën 6.5: “Tri gjëra të mira, më të mirat në të gjithë Interin: penalltia, goditja me të djathtën nga jashtë zone dhe asisti me kokë për Arnautovic. Shqiptari meriton komplimentet e shokëve të skuadrës”.

Në të njëjtën linjë qëndron edhe “Tuttosport”, që e vlerëson me notën 6.5: “Merr topin dhe shkon vetë te pika e bardhë si zëvendës i vërtetë i Calhanoglu, spikati edhe në fund të pjesës së parë me një tjetër goditje. Mbrëmje pozitive për Asllanin”.

Ndërkohë, edhe “Corriere della Sera” dhe “La Repubblica” i vendosin notën 7, duke përforcuar idenë se Asllani jo vetëm që e përmbushi detyrën, por tregoi edhe karakter, qetësi e pjekuri në një moment vendimtar për sezonin e Interit.

Notat e Kristjan Asllanit, pas Inter-Verona 1-0:

“TuttoMercatoWeb”: 7

“Gazzetta dello Sport”: 6.5

“Corriere dello Sport”: 7

“Tuttosport”: 6.5

“Corriere della Sera”: 7

“La Repubblica”: 7

“L’Interista”: 7