Në takimin e mbajtur në Shtëpinë e Bardhë mes Donald Trump dhe Gianni Infantino në muajin mars të kaluar, dukej se ishte arritur një marrëveshje përfundimtare, që lidhte interesat e përbashkëta të administratës amerikane me ngjarjet futbollistike, që e prekin drejtpërdrejtë në vitet e ardhshme: Botërori 2026 dhe, mbi të gjitha, Kupa e Botës për Klube 2025.

U fol për një marrëveshje maksimale, vende të reja pune, një ndikim ekonomik prej miliarda dollarësh, të cilave Presidenti i SHBA-së iu përgjigj duke nënshkruar një dokument që garantonte investim të plotë për krijimin e një task-force speciale në shërbim të FIFA-s.

Por tani po dalin detaje të tjera shqetësuese për këtë turne, që do të nisë këtë verë, për të cilin Infantino nuk ka arritur të sigurojë përjashtimet tatimore të nevojshme për të garantuar lehtësitë e mëdha financiare të premtuara për klubet pjesëmarrëse.

Kupa e pasur e Botës për Klube, e promovuar shumë nga FIFA dhe nga presidenti i saj Gianni Infantino, që prej muajsh udhëton nëpër botë duke e shpallur madhështinë e saj, mund të mbetet vetëm në fjalë.

Në realitet, deri më sot, përveç dyshimeve dhe problemeve reale me atraktivitetin, pak javë para fillimit të turneut nuk ka asnjë marrëveshje apo garanci me qeverinë amerikane për përjashtime apo lehtësira tatimore, të cilat ishin kërkuar dhe premtuar. Kjo situatë po rrezikon seriozisht marrëdhënien formale mes Trump dhe Infantinos.

FIFA kishte shpallur një çmim total prej 1 miliard dollarësh (rreth 900 milionë euro) për turneun, ku deri në 125.8 milionë dollarë do t’iu shkonin fituesve. Megjithatë, pa marrëveshje tatimore, klubet rrezikojnë t’iu paguajnë dhjetëra, milionë dollarë tatime autoriteteve amerikane, përveç tatimeve që duhet të paguajnë në vendet e tyre përkatëse.

Sipas “The Guardian”, që kishte hetuar thellësisht takimet mes FIFA-s dhe Donald Trump në mars, politikat aktuale tatimore të SHBA-së po rrezikojnë të dëmtojnë planet ekonomike rreth edicionit të parë të Kupës së Botës për Klube (të zgjeruar). Në raportin delikat me Trump, FIFA aktualisht po zhvillon negociata të dëshpëruara me autoritetet amerikane, të cilat deri më tani kanë refuzuar përjashtimet tatimore për 32 klubet pjesëmarrëse.

Një situatë që bie fort ndesh me fjalët e Infantinos, i cili kishte shpallur ndikim ekonomik prej 40 miliardë dollarësh dhe krijimin e 200.000 vendeve të reja pune, pikërisht përmes Kupës së Botës për Klube 2025 dhe Botërorit 2026. Kujtojmë edhe që vetë Trump kishte nënshkruar një dokument që zyrtarizonte task-forcën për Kupën e Botës.

Problemi që po e çon Infantinon në çmenduri në kërkim të një zgjidhjeje urgjente, për të shmangur një katastrofë para se festa të nisë, është se ndryshe nga Botërori 2026, ku FIFA ka marrë tashmë garanci për përjashtime tatimore për kombëtaret pjesëmarrëse, nuk ndodh e njëjta gjë me Kupën e Botës për Klube që do të nisë këtë verë.

32 skuadrat pjesëmarrëse rrezikojnë të mos përjashtohen nga shumë taksa lokale, shtetërore dhe nga taksat mbi shitjen e biletave, për shkak të një njoftimi shumë të vonuar nga ana e FIFA-s. Kjo do të ndikonte rëndë në të ardhurat e premtuara nga Infantino, i cili rrezikon një dështim të bujshëm në nivel global.