Policia e Shkodrës ka goditur një tjetër rast të rëndë të armëmbajtjes pa leje dhe veprimtarisë së strukturuar kriminale, në kuadër të operacionit të koduar “Baruti”.

Në fshatin Rrencë u zbulua një banesë e kthyer në bazë për llogari të grupeve kriminale, ku u gjetën dhe sekuestruan: 11 pistoleta, një kapsollë detonatore me fitil zjarrpërcjellës, rreth 2000 fishekë të kalibrave të ndryshëm, 2 jelekë antiplumb dhe një silenciator.

Në pranga ra pronari i banesës, shtetasi Ç. J., 61 vjeç, me precedent të mëparshëm penal për armëmbajtje pa leje. Ai dyshohet se kishte vënë në dispozicion ambientet për aktivitet kriminal të armatosur.

Armët dhe municionet e sekuestruara do t’i nënshtrohen ekspertizës balistike pranë Institutit të Policisë Shkencore, për të përcaktuar nëse janë përdorur në ngjarje kriminale të mëparshme.

Nën drejtimin e Prokurorisë së Shkodrës, vijojnë hetimet për identifikimin dhe ndjekjen penale të personave të tjerë të përfshirë në këtë rrjet kriminal.

Materialet procedurale i janë referuar Prokurorisë për veprime të mëtejshme ligjore.