Vrasje e dyshuar në Shkodër: Shtetase amerikane gjendet e pajetë në një banesë me qira, bashkëjetuesi nën hetim

Shkodër, 2 maj 2025 – Një ngjarje e rëndë është regjistruar rreth orës 10:15 të paradites në rrugën "At Shtjefën Gjeçovi", në qytetin e Shkodrës.

Në një banesë të marrë me qira, dyshohet se është vrarë me mjet prerës një shtetase amerikane, e identifikuar me inicialet S. S.

Në vendngjarje është gjetur bashkëjetuesi i saj, gjithashtu shtetas amerikan, i cili dyshohet si autori i ngjarjes.

Viktima është Sandra Saporito dhe i dyshuar Brandon Saporito.

Ai është transportuar menjëherë në spital për ndihmë mjekësore, pasi dyshohet se ndodhej nën ndikimin e alkoolit dhe kishte dëmtime të lehta në duar, të shkaktuara me mjet prerës.

Grupi hetimor, nën drejtimin e Prokurorisë, ka nisur menjëherë punën për zbardhjen e plotë të rrethanave të krimit dhe për dokumentimin ligjor të ngjarjes.

Autoritetet janë duke mbledhur prova dhe dëshmi që mund të ndihmojnë në sqarimin e motivit dhe dinamikës së kësaj ngjarjeje tragjike. /noa.al

Shkodër/Informacion shtesë

Në vijim të informacionit të dhënë në lidhje me ngjarjen në lagjen "At Shtjefën Gjeçovi", informojmë se autori i dyshuar i vrasjes së shtetases amerikane, S. S., 54 vjeçe, është bashkëjetuesi i saj, shtetasi amerikan, B. S., 57 vjeç.

Grupi hetimor, në drejtimin e Prokurorisë, vijon punën për sqarimin e rrethanave të këtij rasti.