Një moment interesant gjatë transmetimit “live” në “Sky Sport” mes Zvonimir Boban dhe Fabio Capello, ku ish-mesfushori kroat zbuloi një prapaskenë të veçantë në lidhje me rezultatin që kishte parashikuar ish-trajneri i Romës dhe Juventusit gjatë ndeshjes mes Barcelonës dhe Interit.

Kjo ndodhi kur rezultati ishte 2-0 për zikaltërit, që më pas u përmbys nga Barça e Flick. Kështu u shpreh Boban në studion e “Sky”, pas përfundimit 3-3 të ndeshjes së parë gjysmëfinale të Ligës së Kampionëve mes katalanasve dhe zikaltërve: “Ishte një ndeshje spektakolare, e jashtëzakonshme.

Kur rezultati ishte 0-2 dhe duke parë si po luante Barcelona, zoti Capello më tha që ndeshja do të përfundonte 3-3”. Ky zbulim i kroatit shkaktoi të qeshura në studio. “Nuk ia qëllon gjithmonë, por këtë herë e tha rezultatin final kur ndeshja ishte ende 0-2”, – shtoi Boban.