Aksidenti tragjik në aksin Pogradec-Korçë – u përplas për vdekje këmbësorja 43-vjeçare

Një aksident i rëndë me pasojë vdekjen e një këmbësoreje ka ndodhur në orët e para të mëngjesit të sotëm, në aksin rrugor “Pogradec–Korçë”, pranë zonës së Maliqit.

Sipas informacioneve paraprake, automjeti i drejtuar nga shtetasi Devis Xhelollari akuzohet se ka përplasur për vdekje shtetasen Elza Mançe, 43 vjeçe, e cila po kalonte rrugën në këmbë.

Goditja ka qenë fatale dhe viktima ka ndërruar jetë menjëherë në vendngjarje, pa mundësi ndërhyrjeje mjekësore.

Sipas dëshmitarëve në zonë, gjithçka ndodhi me shpejtësi: një çast i vetëm, një frenim i vonuar dhe më pas trupi i pajetë i gruas së shtrirë në asfalt, ndërsa automjeti ndaloi disa metra më tej.

Paniku dhe tronditja përfshinë edhe drejtuesin e mjetit, i cili u shoqërua menjëherë në ambientet e Komisariatit të Policisë për t’u marrë në pyetje.

Grupi hetimor, nën drejtimin e Prokurorisë, po punon për zbardhjen e plotë të rrethanave të aksidentit që shihni në foto dhe për përcaktimin e përgjegjësisë së plotë ligjore.

Ndërkohë, trupi i viktimës është dërguar në morg për ekspertizë mjeko-ligjore.

Ky aksident i rëndë ngre sërish alarmin për sigurinë e këmbësorëve në akset rurale dhe për nevojën për më shumë kujdes nga drejtuesit e mjeteve, sidomos në orët me errësirë. /noa.al