Një 41-vjeçar nga Deçani i Kosovës, i shpallur në kërkim ndërkombëtar, është arrestuar në pikën kufitare të Morinës, teksa tentonte të hynte në territorin shqiptar.

Shtetasi Himë Lufaj, rezulton i kërkuar nga autoritetet austriake për vepra të rënda penale, përfshirë “Vrasje e mbetur në tentativë”, “Plagosje e rëndë” dhe “Vjedhje”.

Gjatë kontrollit të dytë në hyrje të Shqipërisë, në kuadër të analizës së riskut dhe shkëmbimit të të dhënave me Interpol Tiranën, Policia Kufitare dhe strukturat e Policisë Kukës verifikuan identitetin dhe konfirmuan urdhrin e arrestit ndërkombëtar të lëshuar nga Interpol Vjena.

41-vjeçari u ndalua me qëllim ekstradimi drejt Austrisë, ndërsa procedurat për dorëzimin e tij po vijojnë në bashkëpunim me autoritetet austriake. /noa.al