Interi arriti një barazim spektakolar 3-3 në transfertë ndaj Barcelonës. Pak e kishin parashikuar një rezultat të tillë në ndeshjen e parë të gjysmëfinale të Ligës së Kampionëve, veçanërisht duke marrë parasysh momentin e vështirë që po kalonin zikaltrit, pas tri humbjeve radhazi kundër Bologna, Milanit dhe Romës në Serie A dhe Kupë, pa shënuar asnjë gol në 270 minuta lojë.

E sigurt është që sfida e kthimit në “San Siro”, pas më pak se një jave, mbetet e hapur dhe e paparashikueshme. Megjithatë, pavarësisht paraqitjes së guximshme në “Montjuïc”, Interi nuk do të mund të përfitojë nga asnjë lloj avantazhi, pasi rregulli i golit jashtë fushe është hequr tashmë prej disa vitesh.

Pikërisht mbi këtë çështje ka reflektuar Thierry Henry, legjenda franceze dhe ish-sulmuesi i Arsenalit, i cili gjatë programit “CBS Golazo” ngriti pikëpyetje mbi drejtësinë e kësaj rregulloreje, sidomos në dritën e rezultateve si ai i ndeshjes së mbrëmshme:

“E di që duhet ta pranojmë dhe që ky është rregulli, por si mund të shënosh 3 gola jashtë fushe dhe të mos kesh asnjë avantazh? Goli jashtë fushe, sipas meje, është i vështirë për t’u realizuar. Duhet t’i japim merita Interit për paraqitjen që bëri, sepse sinqerisht nuk prisja që mund të shënonte 3 gola në fushën e Barcelonës”.