Kapsula e kthimit e anijes kozmike kineze "Shenzhou-19", me astronautët Cai Xuzhe, Song Lingdong e Wang Haoze, arriti të mërkurën në vendin e zbritjes në Dongfeng në Rajonin Autonom të Mongolisë së Brendshme të Kinës Veriore.

Personeli i mbikëqyrjes dhe kujdesit mjekësor në vend pohoi se të tre astronautët ishin mirë me shëndet.

Misioni me astronautë "Shenzhou-19" ishte një sukses i plotë, njoftoi Agjencia e Fluturimeve Hapësinore me Astronautë e Kinës (CMSA).

"Shenzhou-19" u nis më 30 tetorin e vjetshëm nga Qendra e Lëshimit të Satelitëve e Jiuquan-it në Kinën Veriperëndimore. Anija kozmike kreu më vonë një takim të shpejtë automatik dhe u lidh me kombinimin e stacionit hapësinor.

Tre astronautët qëndruan në orbitë për 183 ditë, kohë gjatë së cilës kryen tre ecje në hapësirë, duke thyer rekordin e mëparshëm botëror për ecjen më të gjatë në hapësirë të vendosur nga ekuipazhi i "Shenzhou-18".

Ata e vendosën rekordin gjatë ecjes së tyre të parë në hapësirë më 17 dhjetor 2024, e cila zgjati për nëntë orë, njoftoi CMSA.

Ekipi kreu gjithashtu një gamë të gjerë eksperimentesh të shkencës hapësinore të fushave të ndryshme, duke përfshirë fizikën themelore në mikrogravitet, shkencën e materialeve hapësinore, shkencën e jetës hapësinore, mjekësinë e hapësirës ajrore dhe teknologjinë hapësinore.