“Inzaghi nuk është trajneri im i preferuar, por me të Interi është bërë skuadra italiane më e njohur në Europë”. Kështu është shprehur Nicola Ventola, ish-sulmues i zikaltërve, gjatë emisionit “Viva el Futbol”.

Më tej, ai vazhdoi: “Në Ligën e Kampionëve, Interi është protagonist prej tri vitesh, ka marrë vlerësime të rëndësishme në sytë e vëzhguesve të huaj. Nuk është e vërtetë që lojtarët me Inzaghin si trajner nuk janë përmirësuar, skuadra zikaltër është e bukur për t’u parë”.

Megjithatë, ndeshja kundër Romës nuk ka qenë aspak pozitive dhe Ventola nuk ngurroi ta theksonte këtë: “Mungesat e Bastonit dhe Mkhitaryan kanë ndikuar, duke pasur parasysh se mungonte edhe thellësia, që sjellin Thuram e Dumfries. Pashë Interin më të dobët të këtij sezoni, skuadra ishte e ngadaltë dhe teknikisht e pasaktë.

Interi ka 12-13 titullarë, është normale që ata që luajnë pak mund të bëjnë ndeshje të këqija. Megjithatë, unë nuk mund ta gjykoj keq punën e Inzaghit, edhe nëse nuk e fiton këtë kampionat. Kam parë gjëra shumë të mira në nivel loje tek Interi, me atë trajner, në këto katër vite”.