Arrigo Sacchi është i bindur se Napoli tashmë e ka fituar titullin dhe kjo duket qartë në intervistën e dhënë për “Il Mattino”: “Ishte një mision i pamundur dhe ai e bëri të mundur. Mendoj se, përveç Antonios, askush nuk besonte vërtet se mund t’i shkonte deri në fund titullit. Ai ia doli, sepse nuk e konsideron veten një fenomen, por e di që në bazë të çdo arritjeje është puna. Ajo që ka rëndësi është t’u shpjegosh lojtarëve të tu se paraprita e një dështimi është ndjenja se ke arritur gjithçka”.

Sipas tij, tani gjithçka është vendosur për titullin, edhe pse kanë mbetur për t’u luajtur edhe 4 ndeshje deri në fund: “Më vjen keq për Inzaghin, por agresivitetin dhe krenarinë që shoh te loja e Contes nuk e shoh tek Interi i tij në këto javët e fundit. Dhe pastaj ai McTominay…, vetëm Antonio mund t’ia jepte dëshirën për t’u përmirësuar dikujt që vinte nga Manchester United”.

Megjithatë, nuk ka siguri për të ardhmen e Contes në stolin e bluve: “Mendoj se do të qëndrojë, përse duhet të largohet? Për mua e bukura te Napoli ende nuk ka ardhur. Vetëm ai mund ta çojë klubin një hap më lart”.

Ndoshta e thërrasin Sacchi-n që ta bindi Antonion të qëndrojë te Napoli: “Më mirë jo. E bëri Marotta kur ishin te Juventusi, më kërkoi ta bindja të ndryshonte mendim, sepse Conte kishte kundërshtuar, pas refuzimit për të marrë një lojtar që e donte me ngulm. Unë u përpoqa, por në fund ai u largua gjithsesi dhe nuk më dëgjoi.

Antonio është kokëfortë; nëse e vendos një gjë në mendje, nuk e ndryshon për asgjë në botë. Sidoqoftë më duket se këtë herë e ka dashur Napolin po aq sa Napoli e ka dashur atë. Nuk besoj që ky raport do të mbyllet kaq shpejt”.