PSG doli fitimtar nga “Emirates Stadium”, në ndeshjen e parë gjysmëfinale të Champions League. Goli i vetëm i takimit, i shënuar nga Dembélé në minutën e katërt, mjaftoi për t’iu dhënë fitoren francezëve ndaj Arsenalit. Një fitore e rëndësishme për ekipin e Luis Enrique, por ndeshja e kthimit në Paris do të jetë vendimtare.

Trajneri i Arsenalit, Mikel Arteta, nuk e fshehu zhgënjimin pas ndeshjes. Në intervistën për “Amazon Prime”, ai komentoi: “Jam i zhgënjyer nga rezultati. Dhamë shumë në këtë ndeshje. Në 10-15 minutat e para patëm vështirësi për të gjetur ritmin dhe dominuar. Është zhgënjyese që nuk arritëm të marrim të paktën një barazim”.

Arteta pranoi cilësinë e kundërshtarit, por theksoi detajet që bënë diferencën: “Te detajet është gjithmonë rreziku, ishte merita e tyre në këtë drejtim. Kishim shtatë lojtarë pas topit te rasti i golit dhe ata ishin cinikë, ndonjëherë duhet thjesht të pranosh talentin individual”.

Për golin e anuluar të Merinos dhe rastet e humbura të skuadrës së tij: “Milimetrat e vendosën atë pozicion jashtë loje. Aksioni i Martinellit në situatën një kundër një ishte i bukur, e ka bërë edhe më parë. Trossard gjithashtu në një kundër një dhe Donnarumma priti. Këto janë diferencat, ky është niveli”.

Në vijim, Arteta u ndal edhe te mungesa e Thomas Partey: “Mendoj se Rice dhe Merino ishin të jashtëzakonshëm. Partey na jep opsione ndryshe, na jep fleksibilitet për ta ndryshuar ndeshjen. Kjo ishte vetëm gjysmëfinalja e parë, kemi një mundësi të madhe për të shkuar në finale”.