Në një ceremoni të zhvilluar sot në Akademinë e Sigurisë, 93 studentë përfunduan me sukses ciklin e parë "Bachelor" në Fakultetin e Sigurisë dhe Hetimit, duke u diplomuar dhe duke marrë gradën policore "Nënkomisar".

Drejtori i Përgjithshëm i Policisë së Shtetit ka miratuar urdhrat për emërimin e tyre në detyrë dhe dhënien e gradës. Gjatë ceremonisë, Drejtoresha e Burimeve Njerëzore në Policinë e Shtetit, Drejtues Anisa Duçkollari, në emër të Drejtorit të Përgjithshëm Drejtues Madhor Ilir Proda, uroi të diplomuarit për suksesin dhe theksoi rëndësinë e përkushtimit dhe ndershmërisë në ushtrimin e detyrës.

Rektori i Akademisë vlerësoi disiplinën, dëshirën për të mësuar dhe përkushtimin e treguar nga studentët gjatë tre viteve të studimeve.

Nënkomisarët e sapodiplomuar janë shpërndarë në 12 qarqet e vendit, sipas nevojave të strukturave policore. Injektimi i këtyre forcave të reja pritet të ndikojë pozitivisht në rritjen e cilësisë së hetimit dhe performancës së përgjithshme të Policisë së Shtetit. /noa.al