Projekti madhor për rigjenerimin dhe mobilimin urban të lumit Gjanica në Fier po hyn në fazën përfundimtare, duke avancuar punimet në lotin 3. Nga një burim përmbytjesh dhe problematikash mjedisore, Gjanica po shndërrohet në një nga shëtitoret më të mëdha dhe më të bukura urbane në Shqipëri.

Kryeministri Edi Rama, i shoqëruar nga zëvendëskryeministrja Belinda Balluku dhe kryetari i Bashkisë Fier, Armando Subashi, inspektuan nga afër kantierin e punimeve. Balluku vlerësoi ecurinë e shpejtë të projektit, duke theksuar se me përfundimin e këtij segmenti, qyteti do të fitojë një shëtitore të plotë përgjatë lumit Gjanica.

Projekti parashikon rehabilitimin e rreth 5 kilometrave shëtitore në të dy anët e lumit, duke e bërë atë më të gjatën në vend. Sipas kryebashkiakut Subashi, janë ndërtuar dy nivele shëtitore me trotuare, ndriçim dhe hapësira të gjelbërta, ndërsa cilësia e punimeve është vlerësuar si shumë e lartë.

Transformimi i Gjanicës pritet të sjellë jo vetëm një hapësirë të re rekreative për qytetarët, por edhe një zgjidhje të qëndrueshme ndaj përmbytjeve dhe problematikave mjedisore historike, duke e kthyer Fierin në një nga qytetet më atraktive të jugut të Shqipërisë. /noa.al