Madrid- Operatori i rrjetit elektrik të Spanjës pranoi sot se energjia diellore mund të jetë fajtore për ndërprerjet e energjisë elektrike që sollën kaos në pjesën më të madhe të gadishullit Iberik të hënën.

Shefi i Operacioneve të Sistemit të Red Eléctrica, Eduardo Prieto tha në një konferencë për shtyp se sistemi i energjisë elektrike u godit nga një humbje dramatike e prodhimit të energjisë në Spanjën jugperëndimore, që shkaktoi paqëndrueshmëri në sistem dhe çoi në shkëputjen e tij nga rrjeti francez.

Ai tha se ishte e mundur që gjenerimi i prekur të ishte diellor, por është shumë herët për të thënë me siguri, duke shtuar se sistemi tani ishte i qëndrueshëm dhe funksiononte normalisht.

Vlerësimi paraprak i operatorit përjashtoi sulmin kibernetik si shkak të ndërprerjes, teksa kritikat janë shtuar ndaj qeverisë spanjolle për mungesën e informacionit mbi këtë ngjarje.

Ndërprerja e energjisë elektrike bëri që aeroplanët të mbeteshin në tokë, trenat të ndaleshin dhe trafiku të ndalej në qytetet e mëdha. Pjesë të mëdha të vendit mbeten në gjendje të jashtëzakonshme, teksa raftet e supermarketeve janë bosh pas blerjeve të djeshme.