Rikthim në fushë për Kyle Walker. Mbrojtësi i Milanit ka qenë jashtë fushave për shkak të një frakture të krahut, që e detyroi të humbiste ndeshjet e kampionatit kundër Udinese dhe Atalanta, si dhe derbin e fituar 3-0 në Kupën e Italisë kundër Interit, që siguroi kualifikimin në finale për ekipin e Sergio Conceiçao.

Futbollisti anglez u kthye në fushë në fitoren 2-0 kundër Venezias, duke luajtur 19 minuta, plus kohën shtesë. Nëpërmjet profilit të tij në Instagram, anglezi ka dashur të festojë rikthimin dhe suksesin ndaj Venezias: "Jam i lumtur që u riktheva dhe fituam tri pikët. Tani ta mbyllim sezonin në mënyrën më të mirë".

Për ish-lojtarin e Manchester City, adaptimi me realitetin italian ka qenë shumë i rëndësishëm. Ai ka zhvilluar 9 ndeshje në kampionat me fanellën e Milanit, si dhe 2 të tjera në Ligën e Kampionëve.

Po ashtu, ka pasur 2 paraqitje në Kupën e Italisë, një në fitoren në shtëpi ndaj Romës në çerekfinale dhe një në ndeshjen e parë gjysmëfinale kundër Interit të Simone Inzaghi. Në total, Walker ka 31 paraqitje sezonale, duke përfshirë edhe periudhën e parë me ekipin e drejtuar nga Pep Guardiola.