Të dhënat po ngarkohen...
Transmetuar më 27-04-2025, 13:50
Makina vidhen në Tiranë, kapet njëri nga autorët. Policia në kërkim të bashkëpunëtorit
Një episod i vjedhjes së automjeteve ka krijuar pasiguri te banorët e një kompleksi në Yzberisht, ku mëngjesin e 25 prillit 2025 një 28-vjeçare zbuloi se makina e saj kishte humbur pa lënë gjurmë nga garazhi i pallatit ku banonte.
Me shqetësimin e madh, ajo iu drejtua Komisariatit të Policisë Nr. 6, duke bërë denoncimin për vjedhjen e automjetit tip "Nissan Micra".
Pak pas njoftimit, specialistët për Hetimin e Krimeve të këtij komisariati u angazhuan për zbardhjen e rastit dhe kapjen e autorëve, raporton noa.al.
Në kuadër të operacionit të koduar "Micro", falë punës së shpejtë dhe hetimeve të detajuara, Policia arriti të identifikojë dy të rinj si autorë të dyshuar: Marjus Shkëmbin dhe Ergivio Hysa (i njohur edhe me mbiemrin Braushaj), të dy 20 vjeç dhe banues në Tiranë.
Pas identifikimit, shërbimet e Policisë organizuan operacionin për kapjen e tyre, duke bërë të mundur arrestimin në flagrancë të Marjus Shkëmbit. Gjatë kontrollit, në afërsi të banesës së tij, u gjet edhe automjeti i vjedhur, i cili u sekuestrua në cilësinë e provës materiale.
Ndërkohë, bashkëpunëtori i tij, Ergivio Hysa, arriti të shmangë kapjen dhe është shpallur në kërkim. Policia vijon punën intensive për lokalizimin dhe arrestimin e tij.
Të dhënat paraprake sugjerojnë se dy të rinjtë kanë vepruar në bashkëpunim të plotë, duke monitoruar lëvizjet në zonë dhe përzgjedhur automjetin e parkuar në një garazh të mbrojtur për të shmangur vëmendjen.
Megjithatë, në saje të veprimeve të shpejta, hetuesit arritën të mbledhin prova të mjaftueshme që çuan në identifikimin dhe kapjen e njërës palë të përfshirë.
Aktualisht, grupi hetimor po vijon hetimet për të zbardhur nëse dy të rinjtë kanë qenë të përfshirë edhe në raste të tjera vjedhjesh të ngjashme në kryeqytet. Njëkohësisht, materialet procedurale i janë referuar Prokurorisë së Tiranës për veprime të mëtejshme ligjore. /noa.al
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd