Shkodër – Mes energjisë së të rinjve votues për herë të parë: Rama bën thirrje për besim të plotë në rrugën drejt BE-së

Në një atmosferë të mbushur me entuziazëm dhe prani të madhe të të rinjve, kryetari i Partisë Socialiste, Edi Rama, zhvilloi një takim në Shkodër ku theksoi rëndësinë e 11 majit si një moment vendimtar për të ardhmen europiane të Shqipërisë.

Duke iu drejtuar për herë të parë votuesve të rinj në këtë qytet, Rama kujtoi me emocione fiksimin e tij të vjetër për të pasur mundësinë të tregonte se çfarë mund të bënte Partia Socialiste për Shkodrën. Ai theksoi se vetëm në dy vitet e fundit, janë realizuar më shumë investime e zhvillime sesa në të gjitha vitet e mëparshme të marra së bashku.

“Viti që lamë pas ishte viti më i mirë ekonomik i Shkodrës në historinë e saj të afërt. Jo vetëm për shkak të rritjes së turizmit, por sepse më në fund qyteti nisi të rilindë,” tha Rama, duke përmendur kthesën e madhe që mori Shkodra pas zgjedhjeve të fundit.

Në mesazhin e tij të drejtpërdrejtë për të rinjtë dhe qytetarët shkodranë, Rama shtroi pyetjen kyçe: “A doni që Shkodra të ketë më shumë fuqi dhe më shumë zë në vendimmarrje? Atëherë, çoni më shumë përfaqësues nga Partia Socialiste në parlament!”

Ai kritikoi opozitën, duke e cilësuar si “kënetë” dhe theksoi se kandidatët e saj janë të konsumuar dhe të paaftë për të sjellë ndonjë ndryshim real. “Kthejnë xhaketën mbrapsht dhe e paraqesin si të re. Nuk kanë asgjë për të ofruar për këtë qytet,” u shpreh ai.

Një nga pikat më të forta të fjalimit të Ramës ishte theksi i vendosur mbi procesin e anëtarësimit të Shqipërisë në Bashkimin Europian. Ai tha se negociatat për integrimin nuk janë një proces automatik dhe se Shqipëria ka një shans të rrallë historik për t’u bërë pjesë e BE-së deri në vitin 2027, nëse përmbush detyrimet e saj.

“Janë mbi 250 mijë faqe që duhet negociuar dhe përkthyer në ligje, në vendime. Duhet më shumë fuqi politike në parlament, që ta çojmë këtë proces deri në fund,” deklaroi Rama, duke shtuar se ky nuk është një proces personal apo partiak, por një interes kombëtar.

Duke iu drejtuar me humor të pranishmëve, ai theksoi se vota e 11 majit është më shumë sesa një votë për një parti, është një provë për vendosmërinë e qytetarëve që duan Shqipërinë në Europë.

Në fund të fjalës, Rama përshëndeti veçanërisht Kejsin – një nga deputetet më të reja të Partisë Socialiste në Shkodër – duke e cilësuar si simbol të energjisë së re dhe të përfaqësimit dinjitoz të grave dhe vajzave në politikë.

Batutat më të spikatura nga Edi Rama me të rinjtë në Shkodër:

“Kush mendon që vota nuk vlen, e ka gabim – Shkodra e tregoi se vota ndryshon historinë.”

“E kanë kthyer xhaketën mbrapsht dhe thonë ‘merre se është e re’. Nuk kanë asgjë për të ofruar.”

“Kemi hyrë në lagjen e BE-së, por tani duhet të hyjmë brenda. Dhe kjo nuk ndodh vetë.”

“Me 250 mijë faqe negociatash nuk shkohet dot në Kuvend me kënetën përkrah.”

“Demokratët e zhgënjyer? Provojeni njëherë simpatizantin tuaj. Po ishte me bufin e kënetës – largohu dhe shiko majtas!” /noa.al