Gazetarja Eni Vasili është nga sot drejtore e përgjithshme e rrjetit të Radio Televizionit Shqiptar. Ajo mblodhi 7 vota nga 11 anëtarë të Këshillit Drejtues të RTSH, në një votim të dytë pasi i pari dështoi dhe çoi në seri dorëheqjesh nga ky Këshill.

Në votimin e sotëm ishin dhe dy kandidatura të tjera, Zoje Jakaj (Marashi) dhe Engjëllush Musai, dukshëm inferiore ndaj Vasilit, gjë që duket se ka rritur shanset e saj për ta fituar postin në këtë proces të përsëritur votimi.

Epopeja e drejtuesve të RTSH vitet e fundit është e mbushur me hije skandali për abuzime financiare duke bërë që drejtues si Thoma Gëllçi të përfundojnë në burg.

Pasardhësi i tij Alfred Peza zgjodhi të japë dorëheqjen vetëm një vit pas zgjedhjes, në një situatë ku emri i tij u përfshi në një vorbull akuzash dhe dyshimesh për ngacmime nga një gazetare.

Eni Vasili u vendos sot në postin e Drejtorit të Përgjithshëm të Radio Televizionit Publik Shqiptar, duke fituar një mandat pesëvjeçar.

Deri dje ajo drejtonte emisionin Open në News 24, në transmetim atje për disa vite. I njëjti program ishte në Top Channel për disa vite.

Më herët ajo ishte në News24 me Studio e Hapur.

Fillesat kryesore në televizion ajo i ka në Alsat Tv ku ishte drejtuese e lajmeve.

Eni Vasili ka prezantuar në Këshillin që e votoi, një platformë dhe vizionin e saj për RTSH. Ky dokument nuk është bërë publik. /noa.al