Tiranë, 25 Prill 2025– Një 40-vjeçar ka rënë në prangat e Policisë së Tiranës, pas një serie vjedhjesh të ndodhura gjatë katër muajve të fundit në një dyqan optike në kryeqytet.

Operacioni policor i koduar “Logo”, i finalizuar nga Komisariati i Policisë Nr. 1, çoi në arrestimin e shtetasit Elson (Durim) Doku, banues në Tiranë. Sipas hetimeve paraprake, ai dyshohet se ka kryer vjedhjen e shtatë palë syzeve nga i njëjti subjekt tregtar, me një vlerë totale që arrin në 11,200 euro.

Autori është një emër i njohur për autoritetet, pasi ka qenë më parë i dënuar për vepra penale të së njëjtës natyrë. Policia po vijon punën për të zbardhur mundësinë e përfshirjes së tij në raste të tjera të ngjashme.

Materialet procedurale janë referuar Prokurorisë për veprime të mëtejshme ligjore.