Një skandal tronditës ka goditur klubin argjentinas San Lorenzo, i njohur ndryshe edhe si skuadra e zemrës së Papa Françeskut. Presidenti i klubit, Marcelo Moretti, është filmuar fshehurazi nga një emision televiziv duke marrë një shumë prej rreth 20 mijë euro “cash”, të cilat i ka futur në xhep.

Pas publikimit të pamjeve, ai ka dhënë dorëheqjen. Tashmë është hapur një hetim nga Federata Argjentinase e Futbollit.

Pamjet janë transmetuar nga emisioni "TLN Denuncia" në “Canale 9”, ku shfaqet një grua, e dyshuar si nëna e një lojtari të ri, që i dorëzon paratë Morettit. Dialogu i regjistruar tregon një marrëveshje të mundshme për t’i siguruar djalit një vend në ekip:

"Moretti":Porque el presidente de San Lorenzo fue denunciado por recibir dinero para fichar a un jugador en las divisiones inferiores pic.twitter.com/jYFZ9uAQ2E

— ¿Por qué es tendencia? (@porquetendencia) April 22, 2025

Gruaja: “Të jap 10 mijë, në rregull?”

Moretti: “25 mijë”.

Gruaja: “Në rregull, në korrik shohim për 15 mijë të tjera”.

Moretti: “Më jep 25 mijë, por firmos për djalin…”

Në një moment, ajo i dorëzon paratë në dollarë amerikanë, të cilat presidenti i merr pa i numëruar. Ai gjithashtu dëgjohet duke folur për nivelin e lojtarëve të rinj dhe vlerësimet që ka bërë.

Pas skandalit, Moretti ka mohuar çdo akuzë dhe e ka quajtur ngjarjen një “donacion spontan”. Në një deklaratë në rrjetet sociale, ai tha: “Nuk ishte ryshfet, ishin para në arkën e klubit. Do të paraqitem para gjykatave dhe do të provoj pafajësinë time. Po marr një periudhë pushimi për të mbrojtur institucionin”.

Ndërkohë, Federata Argjentinase e Futbollit ka hapur një hetim zyrtar për shkelje të nenit 60 të statutit, teksa Moretti rrezikon deri në dy vite pezullim nga çdo funksion sportiv.