Gramsh, 24 prill 2025 – Kryeministri dhe kreu i Partisë Socialiste, Edi Rama, zhvilloi një takim me banorë dhe përkrahës të PS në qytetin e Gramshit, ku theksoi rëndësinë historike të zgjedhjeve të 11 majit. Në një fjalim të gjatë dhe emocional, Rama përshkroi zgjedhjet si një moment kyç, jo thjesht për mandatin e ardhshëm, por për fatin e Shqipërisë në Bashkimin Europian.

Turizëm, agroturizëm dhe rilindja ushtarake: investime konkrete në Gramsh

Në fillim të fjalimit, Rama u ndal tek zhvillimet lokale në Gramsh, duke vënë theksin te rruga e re që e ka lidhur zonën me pjesën tjetër të vendit dhe ka hapur potencial për turizëm dhe agroturizëm. “Do t’u qëndrojmë në krah çdo sipërmarrësi që investon në këtë zonë të bukur,” deklaroi ai.

Kryeministri foli edhe për një projekt të ri të rilindjes së industrisë ushtarake, duke nënvizuar se Gramshi është në listën e zonave ku mund të hapen vende pune me paga të larta për të rinjtë.

11 Maji – Votë për Europën, jo për katër vite, por për dekada

Duke kaluar në temën kryesore të fjalimit, Rama e cilësoi 11 majin si një referendum për Shqipërinë europiane. “Nuk është çështje e një mandati, por e historisë së kombit tonë. Është profecia e Skënderbeut dhe amaneti i rilindasve,” – tha ai.

Ai shpjegoi se Bashkimi Europian nuk funksionon me votë shumice, por me konsensus të 27 vendeve anëtare dhe se Shqipëria ka hyrë më në fund në një fazë ku dera është hapur, por koha për ta kaluar është e kufizuar: tre vite deri në fund të vitit 2027.

SPAK, drejtësia dhe reforma: “Ne i dorëzuam shpatën e ligjit”

Rama theksoi se Partia Socialiste është forca e vetme që i ka dhënë drejtësisë fuqinë për të vepruar lirisht, pa ndërhyrje politike. “Jemi e vetmja forcë politike që i ka dorëzuar drejtësisë shpatën për të ndëshkuar edhe të pushtetshmit,” u shpreh ai.

Duke përmendur rastin e Altin Dumanit dhe hetimeve të SPAK, Rama tha se drejtësia sot është më e fortë se kurrë më parë, dhe çdo përpjekje për ta kthyer pas këtë reformë është një kërcënim për të ardhmen e vendit.

Integrimi europian: “Pasaporta shqiptare, pasaportë europiane për çdo qytetar”

Një pjesë e rëndësishme e fjalës së Ramës iu kushtua ndikimit të integrimit europian në jetën e përditshme të qytetarëve, veçanërisht emigrantëve dhe të rinjve. /noa.al