Zbulohet detaji tronditës në vrasjen e Ilaria Sulës: Telefoni i saj u gjet në shtëpinë e vrasësit filipinas, përdorej për të mashtruar familjarët

Hetimet për vrasjen makabre të Ilaria Sulës, 22-vjeçares shqiptare të vrarë në Romë më 26 mars nga ish-i i saj Mark Antony Samson, kanë zbuluar një tjetër detaj tronditës: celulari i saj është gjetur në banesën e autorit të krimit.

Mediat italiane raportojnë se telefoni u zbulua falë rrëfimit të vetë Samsonit, i ndihmuar nga avokatët e tij, pasi fillimisht ai kishte pretenduar se e kishte hedhur. Më pas, nën presionin e hetimeve, tregoi vendin ku e kishte fshehur: apartamenti i tij në rrugën Homs, lagjja afrikane e Romës – vendi ku ndodhi edhe vrasja.

Telefoni është tashmë në duart e hetuesve për ekspertizë mjeko-ligjore. Ajo që e bën edhe më të rëndë situatën është fakti se Samsoni ka përdorur telefonin e viktimës pas vrasjes për të dërguar mesazhe qetësuese dhe për të mashtruar të afërmit e saj, duke simuluar që ishte ende gjallë.

Paralelisht, edhe celulari i autorit është sekuestruar dhe po analizohen bisedat në rrjetet sociale për të zbuluar nëse vrasja ishte e planifikuar më parë.

Ndërkohë, në këtë akt të rëndë është përfshirë edhe nëna e Samsonit, e cila ka pranuar para autoriteteve se e ka ndihmuar të birin për të zhdukur gjurmët e gjakut dhe çdo provë në banesë pas krimit.

Kujtojmë se trupi i Ilaria Sulës u fut në një valixhe dhe u hodh në një zonë pyjore jashtë Romës. Vetëm pas presionit policor, 23-vjeçari me origjinë filipinase pranoi krimin dhe udhëhoqi hetuesit drejt vendit ku kishte fshehur trupin. /noa.al