Një tjetër version i incidentit shqetësues që përfshiu ish-trajnerin tonë të kombëtares së futbollit, Christian Panucci, ka dalë në dritë. Të dielën në mëngjes, më 21 prill, një zjarr ka shpërthyer në automjetin privat, Audi Q8, i parkuar në vilën e tij në zonën Fonte Laurentina të Romës, ku aktualisht jeton djali i tij, Juan.

Në momentin e ngjarjes, Panucci nuk ndodhej në Itali. Ish-mbrojtësi i njohur dhe aktualisht komentator për “Sport Mediaset”, po kalonte pushimet e Pashkëve në Dubai, së bashku me partneren e tij Sarah Nobile. Atje është informuar menjëherë për ngjarjen nëpërmjet telefonit.

Në vendin e ngjarjes kanë mbërritur zjarrfikësit dhe karabinierët e stacionit “Tor de Cenci”, si dhe të kompanisë “Pomezia”, të cilët po hetojnë rrethanat e zjarrit. Sipas të dhënave paraprake, flakët nuk ishin aksidentale, por të shkaktuara qëllimisht. Fatmirësisht nuk ka pasur të lënduar, por ngjarja ka shkaktuar shqetësim të madh për familjen “Panucci”.

Pamjet e kamerave të sigurisë, si ato të vendosura në vilë, ashtu edhe ato në rrugët përreth, po shqyrtohen nga autoritetet. Një nga pistat është tentativa e dështuar për vjedhje, e ndjekur më pas nga zjarrvënia për të fshirë gjurmët. Megjithatë, nuk përjashtohet as pista e një akti vandalizmi. Hetimet janë në vazhdim, pritet që Panucci të jep deklaratën e tij sapo të rikthehet në Romë.