Një apartament në katin e shtatë të një pallati shumëkatësh në lagjen “29 Nëntori” në Fier është përfshirë nga flakët mëngjesin e sotëm. Të alarmuar nga zjarri, gjitonët kanë lajmëruar menjëherë shërbimet zjarrfikëse, të cilat kanë mbërritur shpejt në vendngjarje.

Burimet paraprake bëjnë me dije se të zotët e shtëpisë, 30 minuta përpara shpërthimit të zjarrit, ishin larguar nga banesa. Rruga e ngushtë që ndodhet në lagje ka vështirësuar ndërhyrjen e mjeteve zjarrfikëse, të cilat kanë pasur vështirësi në shpejtësinë e reagimit.

Aktualisht, forcat zjarrfikëse janë duke punuar për të lokalizuar dhe shuar zjarrin, ndërkohë që nuk raportohet për të lënduar. Autoritetet po hetojnë shkaqet e zjarrit dhe do të informojnë për rezultatet e hetimeve të mëtejshme.