Gjirokastër – Finalizohet operacioni “Last night”, në pranga dy persona për shfrytëzim prostitucioni, procedohen dy të tjerë për moskallëzim krimi. U ndaluan Roberto Leka dhe Kristo Duraku për veprën penale "Shfrytëzimi i prostitucionit", kryer në bashkëpunim

Policia e Gjirokastrës ka finalizuar me sukses operacionin e koduar “Last night”, i cili ka çuar në ndalimin e dy shtetasve të dyshuar për shfrytëzim për prostitucion të një 26-vjeçareje nga Berati. Gjithashtu, dy shtetas të tjerë janë proceduar penalisht pasi kishin dijeni për veprimtarinë kriminale dhe nuk e kallëzuan në organet kompetente.

Operacioni u zhvillua nga specialistët e Seksionit për Hetimin e Trafiqeve të Paligjshme në DVP Gjirokastër, në bashkëpunim me Stacionin e Policisë Memaliaj, dhe u mbështet në informacione të siguruara nga inteligjenca policore dhe hetimet e zhvilluara nën drejtimin e Prokurorisë.

Në përfundim të hetimeve, u arrestuan shtetasit:

Roberto Leka 27 vjeç, banues në Tiranë Kristo Duraku, 31 vjeç, banues në Grabjan, Divjakë

Të dy akuzohen për veprën penale “Shfrytëzimi i prostitucionit”, kryer në bashkëpunim, pasi kanë organizuar dhe përfituar financiarisht nga ushtrimi i prostitucionit nga 26-vjeçarja në qytete të ndryshme të vendit.

Ndërkohë, janë proceduar penalisht edhe:

H. I., 40 vjeç, banues në Tropojë R. N., 36 vjeç, banues në Libofshë, Fier

Këta shtetas akuzohen për veprën penale “Moskallëzimi i krimit”, pasi kishin dijeni për aktivitetin e kundërligjshëm, por nuk e kanë raportuar pranë autoriteteve.

View this post on Instagram

A post shared by Agjencia Kombëtare e Lajmeve NOA (@noanews)

Gjatë operacionit janë sekuestruar si prova materiale një shumë parash e dyshuar të përfituar nga kjo veprimtari e paligjshme dhe 6 aparate celularë.

Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për vijimin e procedurave të mëtejshme ligjore.