Qeveria ka miratuar sot një vendim të ri që parashikon kompensim të menjëhershëm financiar për punonjësit e Policisë së Shtetit, në rast se prona e tyre dëmtohet rëndë për shkak të detyrës ose në mënyrë aksidentale, raporton noa.al.

Sipas vendimit të publikuar, kompensimi mund të arrijë deri në 1 000 000 (një milion) lekë, bazuar në aktin e vlerësimit të dëmit nga një ekspert i licencuar.

Kompensimi jepet në dy raste:

Kur prona është dëmtuar si pasojë e një vepre penale të kryer për shkak të detyrës dhe rasti është referuar në prokurori;

Kur dëmi ka ndodhur aksidentalisht gjatë përdorimit të pronës për qëllime zyrtare.

Punonjësi duhet të vërtetojë pronësinë ose procesin e legalizimit të pronës dhe të mos ketë përfituar dëmshpërblim nga kompani sigurimesh për të njëjtin rast.

Për të përfituar kompensimin, kërkohen dokumente si: kërkesë me shkrim, prova për referimin në prokurori, certifikatë pronësie apo dokument legalizimi dhe akti i vlerësimit të dëmit.

Vendimi parashikon ngritjen e një komisioni me 5 anëtarë brenda Drejtorisë së Përgjithshme të Policisë së Shtetit, i cili shqyrton kërkesën brenda 10 ditëve dhe propozon vendimin për pagesë.

Në rast refuzimi, punonjësi ka të drejtë të ankimojë vendimin pranë Drejtorit të Përgjithshëm të Policisë, i cili vendos për rishqyrtimin e çështjes.

Nëse gjatë hetimit ose gjykimit rezulton se dëmi nuk lidhej me detyrën, punonjësi detyrohet të kthejë 100% të shumës së përfituar.

Vendimi i ri shfuqizon vendimin e mëparshëm nr.169, datë 8.3.2017 dhe hyn në fuqi pas botimit në Fletoren Zyrtare. /noa.al