Tiranë – Ish-kryeministri Sali Berisha ka akuzuar qeverinë aktuale dhe kryeministrin Edi Rama për varfërimin ekstrem të shqiptarëve dhe braktisjen masive të vendit, në një fjalim të mbajtur përballë mbështetësve demokratë në Tiranë. Ai tha se në vitin 2013, Partia Demokratike e kishte lënë Shqipërinë si një vend me shpresë dhe rritje, ndërsa sot ajo po shkon drejt shpopullimit dhe rrënimit të mirëqenies.

“Shqipëria në vitin 2013 nuk ishte parajsë, por ishte një vend ku numri i shqiptarëve po rritej, ku të ardhurat kishin arritur në nivelin e vendeve me të ardhura të mesme të larta. Lamë një vend që besonte te e ardhmja. Ndërsa sot, po jetojmë një dramë të paprecedentë: Shqipëria është kthyer në një vend që qytetarët e saj po e braktisin çdo ditë”, tha Berisha.

Ai theksoi se më shumë se një milion shqiptarë janë larguar nga vendi në një dekadë, ndër ta mbi 600 mijë të rinj, ndërsa i cilësoi këto shifra si “zhdukje të materies kombëtare që është ndërtuar ndër dekada”.

Akuzat ndaj qeverisë: ngrirje pagash dhe pabarazi ekstreme

Berisha u ndal veçanërisht tek ekonomia dhe mirëqenia e qytetarëve. Ai e akuzoi qeverinë për dyfishim të taksave dhe tatimeve, ndërkohë që pagat dhe pensionet janë ngrirë për qytetarët e zakonshëm, ndërsa zyrtarët janë pasuruar.

“Rrogat e ulëta nuk janë rritur, pensionet janë ngrirë. Ndërkohë, rrogat e larta janë shtuar me pafytyrësi. Në Shqipërinë e Edi Ramës, diferenca mes rrogës më të lartë dhe rrogës mesatare është bërë 10 deri në 12 herë. Kudo tjetër në botën e qytetëruar kjo diferencë nuk i kalon 4 apo 5 herë,” tha ai.

Sipas tij, kjo është një padrejtësi e thellë që ka bërë që qytetarët të ndihen të përjashtuar nga përfitimet që duhet të vinin nga taksat e tyre. Ai akuzoi qeverinë për përqendrim pasurie dhe pushteti në duart e pak vetëve, në dëm të pjesës më të madhe të shoqërisë.

Kandidatë të rinj dhe mesazhe për të ardhmen

Në fjalën e tij, Berisha prezantoi edhe tre kandidatët e Partisë Demokratike për Tiranën: Erisa Bajaziti, Ilda Zhulali dhe Akil Kraja, duke i cilësuar si përfaqësues dinjitozë të një brezi të ri profesionistësh të shkolluar jashtë vendit, por të përkushtuar për t’i shërbyer Shqipërisë.

Ai vlerësoi gjithashtu drejtuesit lokalë të fushatës në Tiranë, duke theksuar se fushata e PD është një fushatë shprese dhe besimi, në kontrast me atë që e cilësoi si “fushatë e fikur dhe pa vizion të mazhorancës”.

Kritika të forta për korrupsionin dhe afera qeveritare

Berisha nuk i kurseu akuzat për afera korruptive, duke përmendur si shembull çështjen e inceneratorit të Tiranës, për të cilin sipas tij janë disbursuar 130 milionë euro nga buxheti i shtetit pa u ndërtuar as një tullë.

“Paratë e qytetarëve i merrnin me taksa dhe nuk ua kthenin. Në vend që të investonin në shëndetësi, arsim dhe paga, i vidhin. Dhe kur populli nuk ka më shpresë dhe siguri për të ardhmen, largohet,” theksoi Berisha.

Ai i bëri thirrje qytetarëve që në zgjedhjet e ardhshme të votojnë për ndryshimin dhe rikthimin e shpresës në Shqipëri. Në mbyllje, Berisha e cilësoi këtë fushatë si një moment historik për ekzistencën dhe të ardhmen e kombit shqiptar. /noa.al