Një përmbysje e vështirë, por gjithçka mund të ndodhë. Rafael Benitez, ish-trajner i Real Madridit, ka folur për “MBC Masr 2” në prag të sfidës së të mërkurës mes “Los Blancos” dhe Arsenalit:

“Përmbysja e Real Madridit ndaj Arsenalit do të jetë e vështirë, sepse skuadra angleze është e fortë, edhe pse ‘Bernabéu’ është diçka tjetër. Nëse anglezët shënojnë një gol, gjithçka do të bëhet më e ndërlikuar. Në fund të fundit, shpresoj që Real Madridi të fitojë dhe të kualifikohet”.

Ish-trajneri i Napolit foli gjithashtu edhe për largimin e tij nga Real Madridi: “Nuk është e vërtetë që u largova që atje për shkak të Cristiano Ronaldos. Asnjëherë nuk kemi pasur probleme mes nesh, ai është lojtar i madh, një fenomen. U largova për disa çështje të brendshme në klub, por ato nuk kishin të bënin aspak me Ronaldon”.

Ndër temat e trajtuara nga trajneri spanjoll ishte edhe rinovimi i Mohamed Salah: “Ai bën diferencën në çdo ndeshje. Kur një lojtar kujdeset për veten dhe vazhdon të luajë në këtë nivel, mosha nuk ka rëndësi. Sigurisht që Salah e meriton të fitojë ‘Topin e Artë’. Pse jo?”