Policia e Shtetit dhe Meta Platforms INC forcojnë bashkëpunimin kundër krimit kibernetik

Tiranë – Policia e Shtetit dhe kompania teknologjike Meta Platforms INC kanë konsoliduar bashkëpunimin për të përballuar sfidat gjithnjë e më të mëdha në fushën e krimit kibernetik dhe për të garantuar një hapësirë digjitale më të sigurt për qytetarët shqiptarë.

Drejtori i Përgjithshëm i Policisë së Shtetit, Drejtues Madhor Ilir Proda, priti në ambientet e institucionit përfaqësuesit e lartë të kompanisë Meta, znj. Kateryna Kruk, Drejtuese Rajonale e Politikave Publike për Europën Qendrore dhe Lindore, si dhe z. Birger Witt, Menaxher i Besimit dhe Sigurisë për të njëjtin rajon.

Në takim morën pjesë gjithashtu Drejtori i Departamentit të Policisë Kriminale, Drejtues i Lartë Neritan Nallbati, dhe Drejtoresha e Hetimit të Krimeve Kibernetike, Drejtues i Parë Ervina Gjana.

Biseda u zhvillua në një atmosferë të hapur dhe konstruktive, duke u përqendruar në përforcimin e bashkëpunimit për sigurinë kibernetike dhe në rritjen e efikasitetit të hetimeve përmes krijimit të mekanizmave të përbashkët për identifikimin dhe menaxhimin e rreziqeve online.

Një fokus i veçantë iu kushtua shqetësimeve të hasura në platformat sociale të administruara nga Meta, si dhe bashkëpunimit në rastet emergjente që lidhen me mbrojtjen e të miturve. Përfaqësuesit e Policisë së Shtetit falënderuan kompaninë për mbështetjen dhe bashkëpunimin e deritanishëm, duke shprehur gatishmërinë për intensifikimin e mëtejshëm të partneritetit.

Ky takim shënon një hap të rëndësishëm drejt ndërtimit të një hapësire digjitale më të sigurt, ku institucionet shqiptare dhe gjigantët e teknologjisë bashkëpunojnë për të përballuar sfidat e reja të krimit kibernetik.