Tiranë, 15 prill 2025 – Policia e Tiranës ka finalizuar operacionin e koduar “Prevention”, duke parandaluar një ngjarje të mundshme kriminale dhe arrestuar në flagrancë një 37-vjeçar, i cili kishte kanosur me armë një grua dhe posedonte arsenal armësh në banesë.

Shtetasi L. L., banues në Tiranë, u kap nga shërbimet e Komisariatit të Policisë Nr. 4, pas kallëzimit se kishte kanosur me armë zjarri pistoletë një 40-vjeçare në rrugën “Muhamed Deliu”, për motive të dobëta.

Gjatë kontrollit në banesën e tij, u sekuestruan një armë zjarri pistoletë (e dyshuar si mjeti i kanosjes), dy armë gjahu, një armë e ftohtë dhe municion luftarak. Veprimet e shpejta të Policisë bënë të mundur ndalimin e autorit dhe parandalimin e një ngjarjeje me pasoja të rënda.

Materialet procedurale janë referuar Prokurorisë për veprime të mëtejshme ligjore.