Vlorë, 15 prill 2025 – Një tjetër rast i përsëritur i vjedhjes së pronës është goditur nga Policia e Vlorës, në kuadër të operacionit të koduar “Again”, i zhvilluar nga Komisariati i Policisë Vlorë.

53-vjeçari R. P., banues në Vlorë, u kap në flagrancë nga patrullat e Policisë, teksa po largohej me një automjet tip furgon të vjedhur në fshatin Nartë. Nga verifikimet rezultoi se ai kishte thyer masën e sigurisë “Arrest në shtëpi”, vendosur më herët për të njëjtën vepër penale, atë të vjedhjes.

Operacioni u zhvillua në kuadër të intensifikimit të kontrolleve dhe patrullimeve nga Policia e Vlorës, me synim parandalimin e vjedhjeve dhe forcimin e sigurisë publike në zonat urbane dhe rurale.

Aktualisht vijojnë hetimet për dokumentimin e plotë të rastit dhe për të verifikuar nëse i arrestuari është i përfshirë në ngjarje të tjera kriminale të ndodhura më parë në qytetin e Vlorës apo në zonat përreth.

Materialet procedurale i janë referuar Prokurorisë pranë Gjykatës së Juridiksionit të Përgjithshëm Vlorë, për veprime të mëtejshme ligjore.