Nga dokumentet e hetimit të ri mbi bastet sportive të paligjshme online del një shifër befasuese lidhur me huatë që Nicolò Fagioli ka arritur të marrë për të shlyer borxhet e grumbulluara nga loja e fatit.

Sipas asaj që raportohet në urdhrin e sekuestrimit parandalues, mesfushori ka arritur të mbledhë plot 587 mijë euro nga miq, shokë dhe ish-shokë skuadre. Një shumë mjaft e madhe, e dërguar te kreditorët e tij përmes transferimeve bankare drejt argjendarisë “Elysium” apo pagesave me karta “PostePay”.

Po kush e ndihmoi ish-mesfushorin e Juventusit, tani te Fiorentina, të përballonte borxhet në mënyrë kaq të fuqishme? Përgjigjja gjendet në dosjen hetimore dhe në dëshmitë e vetë Fagiolit, që është treguar shumë i aftë në shfrytëzimin e njohjeve të tij dhe mjaft bindës në mbledhjen e parave.

Nga bota e futbollit, ndër ata që kanë kryer pagesa përmes “Elysium” apo në emër të Fagiolit janë lojtarë me të cilët ai ka ndarë fushën në kombëtaret e moshave si Turati, Plizzari, Armini dhe Russo; ish-shokë te Juventusi si Gatti, Dragusin, Di Massimo, Zanandrea dhe Lucas Rosa; si dhe shokë te Cremonese si Okoli, Sarr, Salami dhe Nardi. Disa pagesa janë kryer edhe nga persona të tjerë, jo menjëherë të identifikueshëm, por që mendohet të jenë nga rrethi i ngushtë i miqve të Fagiolit.

Në total, nga dhjetori 2021 deri në tetor 2023, në ndihmën financiare ndaj Fagiolit janë përfshirë 31 persona të ndryshëm (asnjëri prej tyre nuk ka luajtur në faqet ilegale dhe nuk është nën hetim), me shuma që nisin nga 3500 euro. Në bazë të shifrave, ndihma më e madhe ka ardhur nga Francesco Luciani (73 mijë euro), pasuar nga Okoli, Dragusin dhe Gatti, që së bashku kanë dhënë 121 mijë euro. Agjenti i Fagiolit, Cristiano Pompili, ka dhuruar 30 mijë euro, një shumë e ngjashme me ato të Alessio Di Massimo (29 mijë) dhe Salami (28 mijë).

Një rast më vete është ai i Dusan Vlahovic. Emri i sulmuesit të Juventusit shfaqet në faqen parafundit të urdhrit të sekuestrimit për dy pagesa nga 50 mijë euro drejt “Elysium”, por hetuesit nuk e përfshijnë serbin në listën e personave që kanë ndihmuar Fagiolin, duke i lidhur pagesat me blerjen e mundshme të një ose më shumë orëve luksoze.