Joshua Kimmich po shfaqet gjithnjë e më shumë si një lider në fushë dhe jashtë saj. Dhe tani, para ndeshjes së kthimit ndaj Interit në “San Siro”, kapiteni i Bayernit ka dhënë një mesazh të qartë: “Duhet të jemi më kreativë, më efikasë dhe më të pjekur në lojë”.

Duke iu referuar çerekfinales së kthimit ndaj zikaltërve, e cila nis nag disavantazhi 2-1 i mesjavës së kaluar, Kimmich shtoi: "Ajo që më bezdis më shumë është fakti që ne zakonisht jemi skuadra më e mirë në fushë, por kjo nuk reflektohet në rezultate. Çfarë duhet të ndryshojë te Bayerni? Duhet më shumë pjekuri dhe efikasitet. Jemi duke u përpjekur fort, krijojmë shumë raste, por nuk po i konkretizojmë. Në fillim të sezonit ishim më të mirë në këtë aspekt".

Duke parë nga e marta, kur Bayerni do të tentojë përmbysjen në Milano, kapiteni bavarez ishte i qartë: "Nëse jemi më efikasë, mund ta përmbysim rezultatin. Nëse vazhdojmë të shpërdorojmë si në ndeshjet e fundit, nuk do të shkojmë në gjysmëfinale. Duhet të jemi më kreativë për ta lëvizur mbrojtjen e Interit dhe për të krijuar hapësira, që mund t’i shfrytëzojmë".