Tiranë, 14 Prill 2025 – Shërbimet e Komisariatit të Policisë Nr. 6 kanë bërë të mundur lokalizimin dhe kapjen e shtetasit Daut Laze, 49 vjeç, i shpallur në kërkim pas arratisjes nga Institucioni i Posaçëm Mjekësor në IEVP Lezhë, më datë 4 shkurt 2025.

Në bazë të informacioneve të siguruara nga inteligjenca policore, forcat e Policisë arritën ta lokalizojnë dhe ta ndalojnë shtetasin në zonën e Astirit, ku rezulton edhe banues.

Daut Laze ishte arratisur nga ambientet e institucionit ku po vuante dënimin dhe ishte shpallur në kërkim kombëtar. Pas kapjes së tij, veprimet e mëtejshme procedurale do të ndiqen nga Drejtoria Vendore e Policisë Lezhë.

Policia e Shtetit thekson se mbetet e angazhuar maksimalisht për kapjen e personave në kërkim dhe për garantimin e rendit dhe sigurisë.