Bulqizë – Gruaja plagos me mjet prerës bashkëshortin, procedohet penalisht

Një ngjarje e rëndë në familje ka ndodhur në qytetin e Bulqizës, ku një grua dyshohet se ka plagosur bashkëshortin e saj me mjet prerës, pas një konflikti ende të paqartë.

Shtetasja B. Xh., 40 vjeçe, banuese në Bulqizë, është proceduar penalisht, pasi sipas informacioneve të Policisë dyshohet se e ka dëmtuar me mjet të mprehtë bashkëshortin e saj, i cili është dërguar menjëherë për ndihmë mjekësore dhe ndodhet jashtë rrezikut për jetën.

Policia ka sekuestruar armën e ftohtë që u përdor gjatë ngjarjes, si provë materiale në funksion të hetimeve.

Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Dibër, për vijimin e veprimeve ligjore dhe sqarimin e rrethanave të ngjarjes.

Policia është duke hetuar për të zbuluar nëse konflikti kishte karakter të përsëritur dhe nëse kishte shenja të mëparshme dhune në familje. /noa.al

Foto arkiv