Lushnjë – Arrestohet 38-vjeçari që dyshohet për blerje vote në favor të një subjekti politik

Policia e Shtetit ka goditur një tjetër rast të dyshuar të korrupsionit zgjedhor, në kuadër të përgatitjeve për zgjedhjet parlamentare të datës 11 maj 2025.

Specialistët për Hetimin e Krimeve të Komisariatit të Policisë Lushnjë, në bashkëpunim me Prokurorinë e Fierit, arrestuan në flagrancë shtetasin Marin Leka, 38 vjeç, banues në Lushnjë, i cili dyshohet se i ka premtuar një shtetasi dhënien e një shume parash në këmbim të votës së tij në favor të një subjekti politik.

Noa.al konfirmoi se i dyshuari po mblidhte vota për Partinë Demokratike dhe vlera ishte 500 mijë lekë.

Gjatë operacionit, policia sekuestroi kartën e identitetit të shtetasit që dyshohet se ishte përfshirë në këtë marrëveshje të paligjshme.

Marin Leka akuzohet për:

“Korrupsion aktiv në zgjedhje”

“Marrja dhe përdorimi i paligjshëm i dokumentit të identifikimit”

Materialet procedurale i janë kaluar Prokurorisë së Posaçme Kundër Korrupsionit dhe Krimit të Organizuar (SPAK) për veprime të mëtejshme ligjore.

Policia e Shtetit rithekson angazhimin e saj për të garantuar një proces zgjedhor të ndershëm dhe të ligjshëm, dhe u bën thirrje qytetarëve të denoncojnë çdo rast të ngjashëm përmes numrit pa pagesë 112 ose në Komisariatin Dixhital.