Presidenti kinez Xi Jinping u takua të premten në Pekin me kryeministrin spanjoll Pedro Sanchez

Presidenti Xi u shpreh se bota po përjeton përshpejtimin e ndryshimeve të një shekulli dhe rreziqet e sfidat po shtohen.

Vetëm nëpërmjet bashkëpunimit, vendet e ndryshme mund të ruajnë paqen e qëndrueshmërinë botërore dhe të nxisin zhvillimin e begatinë global.

Xi theksoi më tej se sivjet është 20-vjetori i vendosjes së marrëdhënieve të partneritetit të gjithanshëm strategjik ndërmjet Kinës e Spanjës dhe pala kineze është e gatshme të krijojë marrëdhënie të partneritetit të gjithanshëm strategjik me palën spanjolle që janë më të qëndrueshme nga ana strategjike dhe më dinamike nga ana e zhvillimit.

Ai vuri në dukje se Kina e ka konsideruar gjithmonë BE-në si një pol të rëndësishëm në një botë shumëpolare dhe mbështet në mënyrë të qartë unitetin, zhvillimin dhe rritjen e BE-së.

Kryeministri spanjoll Pedro Sanchez tha nga ana e tij se gjatë 20 vjetëve që kur Spanja dhe Kina vendosën marrëdhënie të partneritetit të gjithanshëm strategjik, ​​të dy vendet e kanë respektuar gjithmonë njëri-tjetrin, kanë bashkëpunuar në mënyrë miqësore dhe marrëdhëniet e tyre kanë vazhduar të thellohen e të zhvillohen.

Ai theksoi se BE-ja i përmbahet tregtisë së hapur e të lirë, është e përkushtuar për të mbështetur multilateralizmin dhe kundërshton vendosjen e njëanshme të tarifave. "Nuk do të ketë fitues në një luftë tregtare," u shpreh kreu i qeverisë spanjolle.

Përballë një situate ndërkombëtare komplekse dhe të rëndë, shtoi ai, Spanja e BE-ja janë të gatshme të forcojnë komunikimin e bashkëpunimin me Kinën, të ruajnë rendin tregtar ndërkombëtar, të punojnë së bashku për të përballuar sfida të tilla si ndryshimi i klimës e varfëria, si edhe të mbrojnë interesat e përbashkët të bashkësisë ndërkombëtare.