“Një ndeshje festive? Së pari kemi kthimin e çerekfinaleve. Nuk po bëj një tur lamtumire. Jam ende futbollist”. Këto fjalë të Thomas Müller nuk lënë shumë vend për interpretime. Janë “britma” e një lojtari të lënduar, që reagon ndaj vendimit të drejtorit sportiv Max Eberl, i cili pak ditë më parë zyrtarizoi largimin e tij nga Bayerni.

“Pse nuk luajta nga minuta e parë? Pyetje interesante, por nuk kam ndërmend të futem në këtë diskutim. Derisa të përfundojë ndeshja e kthimit, nuk është koha për të folur për beteja dytësore”, – shtoi Müller me një ton të përmbajtur, por të qartë.

Sulmuesi veteran pritej të ishte titullar ndaj Interit, në mungesë të Jamal Musiala, shumica e mediave e kishin parashikuar në formacionin startues. Sidoqoftë, trajneri Vincent Kompany i befasoi të gjithë, duke e mbajtur në stol deri në minutën e 75-të. Müller u fut në lojë dhe barazoi përkohësisht golin e Lautaro Martínez me një ndërhyrje klasike pranë shtyllës së dytë, i harruar nga mbrojtja zikaltër.

Gëzimi i golit, i theksuar dhe i ngarkuar me nënkuptime, dukej si një mesazh i drejtpërdrejtë për Eberl. Vetë drejtori sportiv ka pranuar vështirësinë e këtij vendimi: “Nuk donte as një kontratë ‘folklorike’. E kuptoj plotësisht që Thomas e mbylli bisedën i zhgënjyer dhe i zemëruar.

As për mua nuk ishte e lehtë; nuk kam fjetur tri netë para se t’ia komunikoja vendimin. Kam qenë emocionalisht shumë pranë tij. Kur ke të bësh me një legjendë si ai, është e dhimbshme të marrësh vendime të tilla. Gjithsesi, brenda klubit ka pasur unitet për këtë çështje, sado e pakëndshme të ishte”.

Në horizont ka ende një ndeshje të rëndësishme, kthimi ndaj Interit në Ligën e Kampionëve, por për Müller, ajo që duhej të ishte një pjesë e fundit e karrierës në paqe dhe nderim, po shndërrohet në një betejë për dinjitet.