Një ngjarje e rëndë ka tronditur Fierin mesditën e sotme, ku një grua është plagosur me armë zjarri në rrethana ende të paqarta. E plagosura është identifikuar si Suzana Mernica.

Krimi ka ndodhur rreth orës 14:00, në afërsi të “Mbikalimit të Dërmënasit”, ndërsa autorët e dyshuar janë babë e bir – Afrim Cimili, 66 vjeç dhe Ali Cimili, 23 vjeç – të dy banues në Dërmënas.

Menjëherë pas atentatit, autorët janë larguar nga vendngjarja dhe janë shpallur në kërkim. Policia ka ngritur pika kontrolli në hyrje-daljet e qytetit të Fierit, si dhe në akset Fier-Vlorë dhe Fier-Lushnjë. Në terren po zhvillohen kontrolle intensive për të kapur dy të dyshuarit.

Grupi hetimor ndodhet në vendngjarje dhe, nën drejtimin e prokurorisë, po punon për zbardhjen e plotë të motivit dhe dokumentimin e provave që do çojnë në arrestimin e autorëve të dyshuar.

Gjendja shëndetësore e Mernicës nuk është bërë ende publike. Policia u bën thirrje qytetarëve që të bashkëpunojnë për kapjen e personave në kërkim.