Po, një gafë klasike nga “Bild”, që ka shkaktuar jo pak ironi, ndoshta edhe një çikë zhgënjim për protagonistin e vërtetë, i cili më vonë e dha kundërpërgjigjen në mejdanin e blertë…. Gjatë mbulimit të ndeshjes mes Bayern Munich dhe Interit, e cila përfundoi me disfatën e vendasve 2-1, prestigjiozja gjermane bëri gabimin e pabesueshëm.

Si prognozë të çerekfinales së parë të Ligës së Kampionëve, e luajtur mbrëmë në “Allianz Arena”, tabloidi i njohur gjerman kishte vendosur të theksonte rëndësinë e sfidës dhe të lavdëronte punën e Simone Inzaghit, trajnerit aktual të Interit, përmes një interviste me Karl-Heinz Rummenigge, ish-sulmues i Interit dhe anëtar i bordit drejtues të Bayernit.

Rummenigge u shpreh me shumë respekt për Inzaghin, duke e cilësuar një "fenomen" dhe surprizë shumë pozitive në skenën ndërkombëtare, veçanërisht pas paraqitjes së shkëlqyer në finalen e Champions-it kundër Manchester City më 2023.

Por këtu vjen momenti komik; në vend që të vendosnin një foto të Simone Inzaghit, redaksia e "Bild" ka publikuar foto të Filippo (Pippo) Inzaghit, vëllai i tij, ish-sulmues i famshëm i Milanit dhe trajner aktual. Një ngatërrim klasik për ata që ndoshta nuk i njohin mirë detajet, por gjithsesi një gafë e madhe, duke qenë se në fjalë ishte një analizë serioze e një figure të rëndësishme si Simone.

Me pak fjalë: ndërkohë që Rummenigge lavdëronte "fenomenin Simone", prestigjiozja "Bild" vendosi në faqe “fenomenin” e gabuar, Pippon.