Trajneri i kombëtares gjermane, Julian Nagelsmann, ka lavdëruar Mats Hummels, duke e cilësuar si një “model për një gjeneratë të tërë mbrojtësish”, i cili “vendosi standarde ndërkombëtare në vitet e tij më të mira”.

“Nuk ka qenë vetëm një qendërmbrojtës i shkëlqyer i kombëtares, por e ka interpretuar rolin e tij në mënyrë moderne”, – tha Nagelsmann, pasi mbrojtësi gjerman i Romës njoftoi tërheqjen nga futbolli në fund të këtij sezoni.

Hummels luajti ndeshjen e tij të 78-të dhe të fundit me Gjermaninë nën drejtimin e Nagelsmann në nëntor 2023. Trajneri nuk e përfshiu në listën për Kampionatin Europian 2024, që u mbajt në Gjermani.

“Gjithmonë kuptohej se çfarë domethënie kishte për të, të luante me Gjermaninë. Shumë lojtarë përfituan nga përvoja dhe kuptimi i tij taktik, sidomos pas fitores në Kupën e Botës 2014, ku ai ishte një shtyllë qendrore e skuadrës. Kombëtarja gjermane ka shumë për ta falënderuar Mats”.