Një rast shqetësues mashtrimi është zbuluar së fundmi në Shqipëri, ku emri dhe identiteti i një prej biznesmenëve më të njohur shqiptarë është keqpërdorur nga grupe kriminale.

Mashtrues të panjohur kanë përdorur fotografinë dhe numrin e telefonit të tij, të klonuar përmes teknologjisë digjitale, për të kontaktuar persona të ndryshëm nëpërmjet aplikacionit WhatsApp.

Ata kanë kërkuar para me pretendimin se biznesmeni Behxhet Pacolli ndodhej urgjentisht në Tiranë dhe do t’ua kthente të nesërmen.

Mesazhet kanë qenë të strukturuara në mënyrë të tillë që të krijonin ndjenjë urgjence, me përmbajtje të tillë si: “Tani urgjentisht më nevojiten para në Tiranë. Po e dërgoj dikë t’i marrë, dhe nesër vij e ua kthej.”

Në disa raste, kërkesat kanë qenë për shuma të mëdha që varionin nga 10.000 deri në 95.000 euro. Fatkeqësisht, disa qytetarë të ndershëm kanë rënë pre e këtij mashtrimi dhe kanë transferuar paratë.

Rasti u zbulua më 1 prill, kur një mik i vëmendshëm dyshoi në mënyrën e të shkruarit dhe e kontaktoi menjëherë vetë biznesmenin, duke parandaluar dëme të tjera të mundshme.

Deklarata publike e biznesmenit:

Kohët e fundit janë shfaqur grupe kriminale të sofistikuara që po përdorin metoda të ndryshme për të mashtruar njerëzit dhe për të përfituar shuma të mëdha parash.

Fatkeqësisht, një rast i tillë ka ndodhur edhe me identitetin tim, në Shqipëri.

Një person i panjohur ka përdorur fotografinë time dhe, përmes teknologjisë digjitale, ka imituar edhe numrin tim të telefonit. Ka kontaktuar disa nga miqtë e mi përmes WhatsApp-it, duke kërkuar para me justifikimin se më duheshin urgjentisht në Tiranë, dhe se do t’i ktheja ditën tjetër.

Mesazhet ishin të tipit: “Tani urgjentisht më nevojiten para në Tiranë. Po e dërgoj dikë t’i marrë, dhe nesër vij e ua kthej.”

Këto kërkesa kanë qenë për shuma të mëdha – nga 10 deri në 95.000 euro. Fatkeqësisht, disa persona kanë besuar dhe kanë dërguar para.

Vetëm më 1 prill, një mik i vëmendshëm kuptoi se mënyra e të shkruarit nuk ishte e imja dhe më njoftoi menjëherë.

JU LUTEM: MOS U MASHTRONI!

Unë nuk kërkoj para nga askush. Nëse merrni ndonjë mesazh të dyshimtë në emrin tim, mos reagoni – por njoftoni menjëherë policinë ose më informoni mua direkt.

Të gjithë së bashku mund t’u kundërvihemi këtyre mashtruesve pa skrupuj.

Ju kërkoj ndjesë për shqetësimin dhe ju falënderoj për mirëkuptimin dhe besimin!