Pogradec, 31 mars 2025 – Policia e Pogradecit ka arrestuar një 44-vjeçar, i cili ka ndihmuar autorin e një plagosje dhe është larguar nga vendngjarja me automjetin e tij. Ngjarja ndodhi më 29 mars 2025, në lagjen nr. 3 të qytetit, ku shtetasi M. T., 36 vjeç, u plagos rëndë me një mjet prerës.

Pas hetimeve të kryera, specialistët për Hetimin e Krimit të Komisariatit të Policisë Pogradec arrestuan shtetasin L. O., për veprat penale "Plagosja e rëndë me dashje" dhe "Prodhimi dhe mbajtja pa leje e armëve të ftohta", ndërsa shtetasi A. B. (alias A. O.) u procedua penalisht për "Përkrahjen e autorit të krimit".

Gjatë hetimeve, u zbulua se shtetasi S. J., 44 vjeç, ishte i pranishëm gjatë ngjarjes dhe ishte ai që ka larguar autorin dhe të plagosurin nga vendi i ngjarjes me automjetin e tij. Po ashtu, është konstatuar se S. J. kishte thyer masën e sigurisë "Arrest në shtëpi" të dhënë nga Gjykata e Korçës për një vepër penale të mëparshme, "Drejtimi i mjetit në mënyrë të parregullt".

Shtetasi S. J. është kapur dhe arrestuar në Komisariatin e Policisë Pogradec për veprën penale “Largimi i të burgosurit nga vendi i qëndrimit”. Materialet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.