Itali, 2025 – Autoritetet italiane kanë sekuestruar pasuri me vlerë mbi 300 mijë euro një shtetasi shqiptar, i cili është dënuar për krijimin e një rrjeti të organizuar të shpërndarjes së drogës. Asetet e sekuestruara përfshijnë prona të patundshme, llogari bankare dhe një automjet.

Sipas mediave italiane, shqiptari, identiteti i të cilit nuk bëhet i ditur, drejtonte një organizatë kriminale të specializuar në trafikimin e kokainës dhe hashashit në Varese, si dhe në provincat e Lombardisë dhe Emilia-Romagnas. Ai njihej si “Shefi i madh” (Big Boss) dhe kishte ndërtuar një strukturë piramidale që funksiononte si një kompani e mirëorganizuar.

Metodat e sofistikuara të grupit kriminal

Hetimet zbuluan se ai sillte në Itali bashkatdhetarë me viza turistike, duke i rekrutuar në organizatë sapo mbërrinin. Anëtarëve të grupit u siguroheshin akomodim, automjete, celularë dhe sasi droge për shpërndarje. Për të shmangur ndjekjen nga policia, organizata kishte krijuar një dhomë operacionesh, ku një operator merrte porositë përmes WhatsApp dhe i shpërndante urdhrat në mënyrë anonime.

Logjistika përfshinte një magazinë të posaçme për automjetet, drogën dhe armët, ndërsa për fshehjen e të ardhurave, familja e tij kishte hapur një piceri për pastrimin e parave. Pavarësisht se me dokumente figuronin pa të ardhura, anëtarët e familjes së tij ishin në fakt drejtuesit e organizatës.

Hetimet ndaj rrjetit vazhdojnë, ndërsa autoritetet italiane vijojnë përpjekjet për çmontimin e grupeve kriminale të trafikut të drogës.