Policia e Tiranës ka vënë në pranga dy të mitur, të dyshuar si autorë të një sulmi me lëndë djegëse në rrugën “Berit Beker”.

Ngjarja ndodhi gjatë natës, kur në oborrin e banesës së shtetasit D. Xh. u hodhën dy shishe me benzinë, raporton noa.al që ju sjell dhe pamjet.

Pak pas denoncimit, shërbimet e Komisariatit Nr. 6 organizuan punën për identifikimin e autorëve dhe zbardhjen e plotë të rrethanave.

Si rezultat i hetimeve të shpejta, të kryera në kuadër të operacionit të koduar “Yard”, u arrestuan dy të rinj, përkatësisht një 17-vjeçar dhe një 16-vjeçar.

Dyshohet se ngjarja është pasojë e një konflikti të mëparshëm për motive të dobëta mes të miturve dhe shtetasit D. Xh.

Materialet iu referuan Prokurorisë së Tiranës për veprime të mëtejshme. Policia po vijon hetimet për dokumentimin e plotë të rastit.