Kamëz – Dhunuan 38-vjeçarin me sende të forta, shpallen në kërkim dy kushërinj, sekuestrohet armë zjarri dhe municion

Një ngjarje e rëndë ka ndodhur në zonën e Kamzës, ku dy persona dyshohet se kanë dhunuar një 38-vjeçar në rrugën “OSBE”, duke e goditur me sende të forta pas një konflikti për motive të dobëta.

Si rezultat i hetimeve të shpejta nga Komisariati Nr. 5, në drejtimin e Prokurorisë së Tiranës, janë identifikuar dhe shpallur në kërkim autorët e dyshuar: Marjo Boja, 26 vjeç dhe Ersjon Boja, 30 vjeç, kushërinj me njëri-tjetrin.

Ngjarja ndodhi rreth orës 10:00 të mëngjesit së djeshme, kur dyshja i prenë rrugën me automjet shtetasit R. V., 38 vjeç dhe e goditën me mjete të forta. I dëmtuari mori ndihmë mjekësore dhe ndodhet jashtë rrezikut për jetën.

Gjatë kontrollit në banesën e Marjo Bojës, Policia gjeti dhe sekuestroi një armë zjarri pistoletë (me leje) si dhe një sasi municioni luftarak, të cilat u morën në cilësinë e provës materiale.

Në kërkim është shpallur edhe automjeti tip “Benz”, me të cilin dy autorët dyshohet se janë larguar nga vendi i ngjarjes.

Policia vijon punën për kapjen e personave të shpallur në kërkim dhe dokumentimin e plotë të rastit. Materialet hetimore i janë referuar Prokurorisë për veprime të mëtejshme.